🌱ຈາກ 10,000 ຕົ້ນ ສູ່ອະນາຄົດທີ່ຂຽວຂຶ້ນ🌱

ເນື່ອງໃນໂອກາດ ສະເຫຼີມສະຫຼອງວັນປູກຕົ້ນໄມ້ແຫ່ງຊາດ, ໃນວັນທີ 1 ມິຖຸນາທີ່ຜ່ານມານີ້, ອົງການ GIZ Laos ໄດ້ຮ່ວມມືກັບໜ່ວຍງານທ້ອງຖິ່ນ, ລວມເຖິງ ພາກລັດປະຈໍາຢູ່ແຂວງຫຼວງພະບາງ, ໂດຍສະເພາະແມ່ນ ພະແນກກະສິກຳ ແລະ ປ່າໄມ້ແຂວງ,  ແລະ ຄະນະຈາກ ບໍລິສັດ DSK Group, ຊຸມຊົນທ້ອງຖິ່ນ, ນັກຮຽນ ແລະ ຊາວບ້ານ ຫລາຍກວ່າ 250 ທ່ານ ຈັດປູກຕົ້ນໄມ້ ທີ່ເຂດປ່າສະຫງວນພູພຶງ (ໂຮງງານນໍ້າແຮ່ທາດ ມິນີໂຣ), ບ້ານ ດອນຄາງ ແຂວງ ຫຼວງພະບາງ.  

ນີ້ເປັນຈຸດເລີ່ມຕົ້ນ ຂອງຄວາມພະຍາຍາມຄັ້ງຍິ່ງໃຫ່ຍ ໃນການຟື້ນຟູພື້ນທີ່ແຫຼ່ງນໍ້າຂະໜາດ 13.5 ເຮັກຕາ ທີ່ເຄີຍເສື່ອມໂຊມລົງ, ປັດຈຸບັນກຳລັງກາຍເປັນ ພື້ນທີ່ປ່າໄມ້ທີ່ມີຄວາມອຸດົມສົມບູນ ທີ່ມີຕົ້ນໄມ້ຫລາຍກວ່າ 10,000 ຕົ້ນ! 

ກິດຈະກຳນີ້ ຍັງສົ່ງເສີມເປົ້າໝາຍ ການຟື້ນຟູພູມິທັດປ່າໄມ້ ແລະ ບັນລຸພື້ນທີ່ປ່າໄມ້ 70% ພາຍໃນປີ 2035, ເຊິ່ງມີສ່ວນສະໜັບສະໜູນ ໃນການຟື້ນຟູປ່າໄມ້, ສະພາບແວດລ້ອມ, ຄວາມພ້ອມໃນການຮັບມື ກັບການປ່ຽນແປງສະພາບດິນຟ້າອາກາດ  ແລະ ການພັດທະນາແບບຍືນຍົງ. ໂດຍຜ່ານການຈັດຕັ້ງປະຕິບັດຂອງອົງການ GIZ Laos, ພວກເຮົາມີຄວາມພູມໃຈ ທີ່ໄດ້ເປັນສ່ວນໜຶ່ງໃນການສະໜັບສະໜູນວຽກງານທີ່ສຳຄັນເຫຼົ່ານີ້ ແລະ ເປົ້າໝາຍການພັດທະນາ ແບບຍືນຍົງລະດັບໂລກ. 

ພວກເຮົາຍັງຮູ້ສຶກຕື່ນເຕັ້ນ ທີ່ຈະໄດ້ສໍາຫຼວດໂອກາດໃຫມ່ຮ່ວມມືກັນກັບ DSK Group ໃນການຈັດການປ່າໄມ້ແບບຍືນຍົງ ເຊິ່ງອາໄສການຮ່ວມມືທີ່ເຂັ້ມແຂງລະຫວ່າງຊຸມຊົນ, ພາກລັດ ແລະ ເອກະຊົນ. 

ກິດຈະກໍານີ້ເປັນສ່ວນໜຶ່ງຂອງຄວາມມຸ່ງຫມັ້ນ ພາຍໃຕ້ການສະໜັບສະໜູນຂອງ ອົງການ GIZ ຕໍ່ກັບການສະຫນັບສະຫນູນດ້ານສະພາບອາກາດ ແລະ ປ່າໄມ້ໃນ ສປປ ລາວ ຜ່ານທາງ 2 ໂຄງການ ທີ່ສໍາຄັນດັ່ງນີ້: 

ໂຄງການ ປົກປັກຮັກສາ ແລະ ນຳໃຊ້ລະບົບນິເວດປ່າໄມ້ ແລະ ຊີວະນາໆພັນ ແບບຍືນຍົງ (ProFEB) ເປັນໂຄງການຮ່ວມສະໜັບສະໜູນໂດຍ ລັດຖະບານເຢຍລະມັນ ແລະ ສະຫະພາບ ເອີຣົບ. ໂຄງການ ປົກປັກຮັກສາ ແລະ ນໍາໃຊ້ລະບົບນິເວດ ປ່າໄມ້ ແລະ ຊີວະນາໆພັນແບບຍືນຍົງ (ProFEB) ແມ່ນອົງປະກອບກ່ຽວກັບວຽກງານປ່າໄມ້ ຂອງແຜນງານການຮ່ວມມືລະຫວ່າງ “ທີມເອີຣົບ ແລະ ສປປ ລາວ ເພື່ອຍົກລະດັບການຄ້າ, ການລົງທຶນ ແລະ ການເຊື່ອມໂຍງ ແບບຍືນຍົງ ແລະ ທົ່ວເຖິງ ໃນຂະແໜງກະສິກຳ ແລະ ປ່າໄມ້ (TICAF)”. ແລະ 

ໂຄງການປ້ອງກັນດິນຟ້າອາກາດ ໂດຍຫຼີກລ້ຽງການທຳລາຍປ່າໄມ້ (CliPAD) ໄດ້ຮັບການສະໜັບສະໜູນ ຈາກ ກະຊວງການຮ່ວມມືດ້ານເສດຖະກິດ ແລະ ການພັດທະນາ ຂອງ ລັດຖະບານເຢຍລະມັນ ແລະ ກອງທຶນດິນຟ້າອາກາດສີຂຽວ ແລະ ຖືກຈັດຕັ້ງປະຕິບັດ ພາຍໃຕ້ ການຮ່ວມມືກັບ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ. ໃນນາມເປັນອົງປະກອບຫຼັກ ຂອງ ຍຸດທະສາດ ການເງິນດິນຟ້າອາກາດສາກົນ ຂອງ ສ.ປ.ປ. ລາວ, ໂຄງການ CliPAD ສົ່ງເສີມ ການຄຸ້ມຄອງປ່າໄມ້ ແບບຍືນຍົງ, ການຜະລິດກະສິກໍາທີ່ຍືນຍົງ, ການຈັດຕັ້ງປະຕິບັດ ການຫຼຸດຜ່ອນ ການປ່ອຍທາດອາຍເຮືອນແກ້ວ ຈາກ ການທໍາລາຍປ່າໄມ້ ແລະ ການເຮັດໃຫ້ປ່າໄມ້ເສື່ອມໂຊມ (REDD+), ແລະ ການວາງແຜນນໍາໃຊ້ທີ່ດິນ ທີ່ອີງໃສ່ຊຸມຊົນ. ໂຄງການ ຖືກຈັດຕັ້ງປະຕິບັດ ໂດຍມີການຮ່ວມມືຢ່າງໃກ້ຊິດກັບ ບັນດາຄູ່ຮ່ວມງານ ແບບສອງຝ່າຍ ແລະ ຫຼາຍຝ່າຍ, ລວມທັງ ທະນາຄານພັດທະນາອາຊີ, ອົງການຮ່ວມມືສາກົນ ແຫ່ງປະເທດຍີ່ປຸ່ນ, ກອງທຶນສາກົນ ເພື່ອການພັດທະນາກະສິກຳ, ທະນາຄານພັດທະນາ KfW, ທະນາຄານໂລກ, ແລະ ພາກສ່ວນເອກະຊົນ. 

ນີ້ເປັນພຽງຈຸດເລີ່ມຕົ້ນເທົ່ານັ້ນ! ທ່ານສາມາດຕິດຕາມການເດີນທາງຂອງພວກເຮົາ ເພື່ອການຮ່ວມສ້າງອະນາຄົດ ທີ່ເປັນມິດຕໍ່ສິ່ງແວດລ້ອມ ແລະ ຄວາມພ້ອມໃນການຮັບມືກັບ ການປ່ຽງແປງສະພາບດິນຟ້າອາກາດໄປພ້ອມໆກັນ!